吃喝玩樂n天遊

前陣子有朋自遠方來, 為了一盡地主之宜,

一下子去了不少地方遊玩, 吃喝玩樂無所不盡其極

Day 1:
友人A未到步已先在航班上水土不服, 見面時已瀉得面無人色,
還好「隨團軍醫」隨即現身, 很快藥到病除,
但首天行程亦不得不取消讓A多加休息,
結果晚餐地點亦由意大利街改為港式煲仔飯,
A則安睡家中休養生息

Day 2:
是日隨團柴可夫「開小差」上班去, 
各團友只好坐上大會安排公共巴士出城去~~
雖則整天在城逛來逛去走了不少回頭路, 但為了吃盡城中美味,
多走兩步多消耗點能量亦在所不繼

美食第一擊: 大隻夾抵食生蚝加德國腸熱狗
美食第二擊: 不合時令但卻大隻鮮甜士多啤梨
美食第三擊: 新鮮滑漏飽到反肚意大利雪糕
美食第四擊: 好玩好食兼而有之朱古力咖啡店
美食第五擊: 地道正宗越南街河粉

病貓日誌

隨著日子一日一日過去, 大貓叔叔口裡面o既傷口都一日一日復原,

顯示應該都唔係咩大問題, 貓奴放心晒

但係一坡未平, 一坡又起...
一向身子強健o既大貓叔叔, 呢排唔知做乜成日打噴嚏,
攪到我又擔心佢唔知會唔會受唔住呢度寒冷o既冬天,
加上前排洗牙o既「打擊」, 患上感冒呢...
好在除左噴嚏之外, 其他乜野症狀都無,
加上佢食得訓得玩得嗲得, 一o的都唔似大病,
所以都諗住觀察多幾日先算
不過其實都見佢一日比一日打得少左噴嚏,
我估佢都開始好番, 可能連醫藥費都慳番

無牙老虎

兩隻貓叔叔一把年紀, 本來大遷移之前都想同佢地洗下牙,

但獸醫話洗牙要全身麻醉, 要長o的時間復原,
所以唔建議在坐長途機之前做, 所以貓奴就不了了之...

點知早幾日同細貓玩玩o下,
唔覺意見倒佢有隻牙原來已經壞到90度向外傾斜,
所以真係唔睇獸醫都唔得了, 貓奴被迫大破慳囊...

o尋日一早帶佢地去到獸醫度, 放佢地入獸醫個籠o個陣突然好想喊...
因為見倒大貓依依不捨咁望實我, 好似知道我要留低佢咁...
同埋都有些少擔心, 話晒全身麻醉都唔係小事...

到傍晚收到診所電話, 當然第一時間飛快去接貓大爺番歸啦,
見倒佢兩個鬼打都無咁精神, 重四圍望八八掛掛咁, 我都無咁擔心,
加上牙仔乾淨晒, 短期內都唔駛擔心佢地變晒無牙老虎,
洗錢都係值o既 !

不過, 獸醫話洗牙時發現大貓口裡面有個傷口,
唔知係普通損傷定其他病, 所以抽左少少組織以防萬一,
叫我地留意下佢, 過多一排無進展就要拎去驗下乜事...
最壞情況可能係生癌....貓奴聽倒真係心裡一沉.....
雖然養得寵物都預左佢地總有一日會病會死,
但...當真係近距離有機會發生o既時候,
心裡面都係好唔開心...

不過見佢近來又開心又食得又玩得又訓得咁,
應該唔似係病, 希望佢真係無事快o的好番啦!!!

豆沙燒餅

一向酷愛糯米甜品的我, 基本上所有軟糯的甜品都不會放過!

可恨的是除了糯米糍和湯圓之外, 再也不懂製作其他糯米甜品了...
所以儘管本身不太喜歡太甜和太油的食品,
每次見倒街上售賣糯米燒餅的店子,
就算賣相多麼油膩多麼不吸引, 我都不會放過定必買一兩件回家品嚐
而每次結局都是非常後悔...唉...

昨天偶然看到來自日本的老婆大人的blog,
內裡很多既容易做賣相又漂亮的甜品和菜色,
看得我手癢心動, 即時拖著老公出門買材料去...
不消半小時便做好了全改以中式材料製作的「日本大福」,
未來得及拍照便悉數轉移入了家中各人肚中

燜排骨

基於30%反叛心理和70%廚興大發,
昨晚趁著奶奶睡了, 連夜趕製了這煲燜排骨...

奶奶從不喜愛下廚, 但又極度期望兒子們都留在家中吃飯,
所以即使不喜歡煮, 也還十分努力的每天在煮
但正正因為不喜歡, 所以廚藝亦與興趣成正比,
即使多落力(或許她根本沒有落力), 煮出來的東西都不可以算好吃,
而且菜色週期之短亦令人難以想像...

眼見這些排骨行將被人糟蹋, 再加上懶蟲上身不願工作,
我便順勢以烹飪為藉口逃避功課 :P
連夜下廚大顯身手!

真的很久沒有這樣任性了, 沒想到感覺原來這樣好 ^_^

燜排骨

材料:
肉排 (一大堆, 我想大概1Kg左右吧)、冬菇 (十數只)、蒜頭 (3-5粒)、薑 (數片)
 

汁料: 蠔油 (一大湯匙)、生抽 (2-3湯匙)、老抽 (2-3湯匙)、粟粉 (1-2茶匙)、
        冰糖(一小粒, 或可改以黃砂糖兩湯匙)、八角 (4-5粒)、水 (適量)
 

醃料: 生抽 (1-2湯匙)、老抽 (1-2湯匙)、酒 (少許)

1/ 肉排洗淨, 切去多餘油脂, 加入醃料調勻待10-15分鐘
2/ 冬菇浸發後榨乾水, 去蒂開邊 (如喜歡全隻亦可)
3/ 大火燒熱1-2湯匙油, 下蒜粒及薑片爆香
4/ 加入已醃好之肉排, 將肉排表面燒至金黃
5/ 加入汁料待沸後轉文火燜約1.5小時
6/ 加入冬菇燜約半小時即成

* 因用文火燜煮水份不會流失太多, 水不宜太多,
   大概加至水位處於肉排一半至四分三位置為佳

牛尾湯

小時候家裡長註的罐頭有:

回煱肉、午餐肉和牛尾湯
全部在我腦海裡都是沒有品牌的罐頭,
彷彿世間上就只有這個品牌這個賣相的罐頭一樣,
只要媽媽發施號令要買, 家中每一個成員都會知道,
要買的就是這一個品牌, 別無他選!

不知從何時起, 我戒掉了購買罐頭食品的習慣,
牛尾湯也就從我的世界裡漸漸淡出,
直至完全忘記了這道菜式...

前陣子老爺嘗過auntie煮的清湯牛尾,
從此一直掛在口邊要買牛尾回家煮...
坐言起行, 更真的買了回來, 可惜奶奶廚藝不佳,
下廚的責任自然落到我這媳婦身上...
在網上尋覓一番, 找到了蘿蔔薯仔牛尾湯的做法,
心裡即時閃過已忘得近乎一乾二淨的罐頭牛尾湯,
登時決定重拾兒時回憶的大計

洗洗切切大費周章四小時後,
熱騰騰香噴噴的牛尾湯便大功告成!
生平首次以真材實料製作出來的牛尾湯,
味道卻與腦海中殘留的罐頭湯味道異常相若,
很難想像原來那些價錢廉宜的國貨罐頭湯,
原來也是這樣真材實料...

想著想著...真的有衝動再買一罐牛尾湯回來,
細細回味小時候的種種回憶...

蘿蔔薯仔牛尾湯

材料: 紅蘿蔔 (數條)、椰菜 (適量)、薯仔 (數個)、牛尾 (半至一條)、洋蔥 (數小個)

1/ 牛尾先飛水備用
2/ 紅蘿蔔、椰菜、薯仔、洋蔥洗淨切件備用
3/ 以少量油猛火炒香洋蔥後, 再爆香牛尾及其他材料
4/ 加適量水, 待水沸後改以文火煮約2-3小時
5/ 待牛尾煮透後加鹽調味即成

*可按喜好添加如粟米等其他材料

這個冬天不怕冷

天氣預報, 今晚最低氣溫---7度; 明晚最低氣溫---4度!!!!!!!

我家兩隻貓大爺, 由細到大都住在高樓大廈,
從來不知冷為何物...
上一個冬天因為仍未放監,
日日有暖燈曬住唔會好凍,
但現在住在家裡, 真的怕大爺們會抵受不住...

兩個貓奴一聽見天氣預報,
當然不敢怠慢, 即時出動為大爺們添置保暖設施!
一看見這個貓窩, 毫不猶豫即時付款 :P

現在看到貓大爺暖烘烘的樣子,
真的高興得由心裡笑出來呢 :D

PS. 同場加映早前為貓大爺添置的防蟻貓兜,
想不到有人與我想法一致, 以同一原理驅蟻之餘,
還申請註冊大量生產...

貓貓唔生性

唔知係咪爺爺嫲嫲唔記得關好門,

俾貓貓有機可乘, 走左入房大肆破壞,
抓到爺爺嫲嫲張假皮大班櫈好似戰地遺跡咁,
一個窿二個窿, 仲有一條二條毛毛飛晒出黎....
好彩俾老公發現先, 所以貓奴已經即時補鑊,
將o的好顯眼o既毛頭通通剪晒,
而家只要唔近距離觀察都唔係咁易發覺...
希望可以瞞天過海啦...
佢兩隻衰野真係唔生性,
又要貓奴擔驚受怕...唉... :(

嚴陣以待

鑒於偏心狗狗的爺爺嫲嫲日內即將回歸,

貓奴為盡最後努力協助貓大爺們爭寵,
攪盡腦汁為愛貓做好準備,
除了換上圍牆特高砂盤,
讓貓大爺自由解放之餘貓砂亦不容易外彈;
亦因家中蟻患嚴重而為貓兜加設了防蟻裝置,
以防貓食引來蟻群嚇壞老人家...

如此花盡心思, 只希望熱愛整潔的爺爺嫲嫲能對貓大爺們另眼相看,
不再心存偏見, 拿去有色眼鏡望清貓大爺們可愛之處吧~~~


特高砂盤


防蟻貓兜

鬼斧神「叉」~~!

因為姐姐一行四人到訪, 全家總動員跑到郊外去走動走動,

意外地竟然大有收穫 :D

從未踏足過跳蚤市場的我,
發現這個每月僅營業一天的Redhill Market時, 真的十分期待,
真開心結果一點也沒有讓我失望!!!

這對手鐲是昨天「趁墟」時找到的, 與姐姐兩人一人一只孖公仔,
我的是右手面圖案較複雜的一只, 而姐姐的按檔主自稱,
則是在模仿維多利亞省獨有的 Liar bird

初初發現這手鐲時, 只覺得它造型不錯,
細心看清楚才發現, 它原來是由一只普通的叉子變身而成的!!!
實在是鬼斧神工, 令人嘆為觀止~~
能夠將這樣平凡的東西改造得如此不平凡,
單計創作者所付出的心思和創意,
那區區數十塊錢的售價實在是物有所值!