守得雲開見月明

不經不覺已經養左兩隻衰野足足十二年,

咁多年來細貓大爺都係怕怕醜醜咁,
船頭驚鬼船尾驚賊o既性格十年如一,
就算連成日朝見口晚見面o既貓奴,
佢都係唔會自願行近, 點都要保持一定距離
對陌生人就更加惡形惡相,
攪到爺爺 女麻女麻 對佢o既評語竟然係「有敵意」....

不過, 我同老公o既苦心經營終於有修成正果o既一日,
呢排唔知發生咩事, 細貓大爺突然開竅,
成日主動走黎向貓奴投懷送抱,
不單鍾意畀人摸, 仲要摸得兩摸就呼嚕呼嚕好鬼enjoy,
實在令貓奴們喜出望外

雖則要對足十幾年先肯完全信任貓奴就真係遲鈍左些少,
不過遲到好過無到啦,
希望貓貓健健康康活多十幾年,
好好享受下做家貓o既真正樂趣啦~~~~